Danny Jordan o amba uri dakalo ḽi fhodza zwoṱhe
Muphuresidennde wa tshigwada tsha Safa Vho-Danny Jordaan vho amba nga ha tshiwo tsha Teboho Mokoena, zwa sia vhatikedzi vhavho vho sinyuwa.
Vhatikedzi vho vha vha tshi khou ṱoḓa phindulo, na uri muthu a dzhielwe vhukando nga ṅwambo wa vhukhakhi he ha ṱoḓa u ita uri Bafana Bafana i xelelwe nga vhuimo havho kha World Cup ya ṅwaha u ḓaho.
Bafana yo ita phoswo ya pandela Teboho Mokoena ngeno o vha o tea u imiswa musi vha tshi tamba na Lesotho nga ṅwedzi wa Ṱhafamuhwe.
Nga mulandu wa zwenezwo, Fifa yo mbo ḓi bvisela Bafana poindi tharu, zwa vha sia vhe khomboni khulwane nahone vha tshi khou lwela vhuimo havho nga maanḓa.
- vhari wana kha facebook| facebook.com/profile.
Mashudi mavhuya, Bafana yo kona u fhedzisela yo dzhena kha khapi ya ḽifhasi nga u kunda Rwanda nga Ḽavhuvhili – na u thuswa nga Nigeria ḽi tshi kunda Benin.
Maṱo oṱhe o vha o sedza Danny Jordaan, muphuresidennde wa maanḓa wa Safa. Munna ane avha na ipfi la u fhedzisela kha zwitu izwi.
Fhedzi musi Jordan a tshi amba nga ha mafhungo aya, o hangwela muthu we a ita vhukhakhi – hu tendiwa uri ndi mulanguli wa Bafana Vho-Vincent Tseka.
O ri: “Vhahashi vha ṱoḓa uri ri hangwe nga ha zwithu zwo fhiraho. “Zwino ri khou sedza kha World Cup.
“zwino thaidzo iyo yo vala. A ri tsha vha na ndavha na thaidzo iyo. Ri kha World Cup.”
“Ri nga si dzule ro livhisa ṱhogomelo kha zwine zwa vha murahu hashu,” o engedza nga u ralo. “Ro lavhelela Tshiphuga tsha Tshaka dza Afrika ngei Morocco.
Ngauralo tshiṱalula tsha Teboho Mokoena tsho fhela. A zwi athu tandululwa. A zwo ngo ṱalutshedzwa. Zwa sokou ngalangala
Khadi dza muvhala wa tshitopana, u xelelwa nga phoindi, u sinyuwa — zwoṱhe zwo phumulwa nga dakalo ḽa u dzhena ha Bafana kha Tshiphuga tsha Ḽifhasi.
Mulaedza wa Danny Jordaan u khagala: Dakalo ḽi fhodza zwoṱhe.
