“Hetshi a si tshone tshifhinga tsha u timatima Bafana” Broos
Mugudisi wa Bafana Bafana Vho-Hugo Broos vho ita khuwelelo ya vhuthihi na lutendo musi Afrika Tshipembe ḽi tshi khou ḓilugisela mutambo wa u khetha khaphu ya ḽifhasi na Rwanda nga Ḽavhuvhili nga madekwana tshitediamu tsha Mbombela.
Mueletshedzi wa kale wa Belgium o tenda uri u ṱangana ha Ḽavhuṱanu na Zimbabwe ho vha hu tshiṱhavhi tshihulwane — tshe tsha sia fulufhelo ḽa Bafana ḽa Tshiphuga tsha Ḽifhasi tsha 2026 ḽi tshi khou thengathenga.
Afrika Tshipembe zwino ḽo sedzana na mutambo une wa fanela u kunda, ḽi tshi ṱoḓa u kunda Rwanda — zwi khwine nga zwikoro zwivhili kana u fhira — ngeno ḽi tshi dovha ḽa rabela feiva nga Nigeria, ḽine ḽa khou sedzana na vharangaphanḓa vha Tshigwada C Benin.
“Ndo vhudza vhatambi, a si mvelelo yavhuḓi kha riṋe,” Broos o ralo kha muṱangano wawe wa vhoramafhungo phanḓa ha mutambo.
“Fhedzi hetshi a si tshone tshifhinga tsha u thoma u ḓi-timatimisa kana vhukoni he ra vhu fhaṱa miṅwahani i si gathi yo fhiraho.”
Broos o ombedzela ndeme ya u dzula wo khwaṱha muhumbuloni musi wo sedzana na u sasaladzwa na mutsiko.
“A ri tei u ita zwine vhaṅwe vha khou ita zwino — u thoma u timatima,u thoma u vhea zwoṱhe kha mbudziso.
A si zwithu zwo teaho u zwi ita. Ri fanela u tikedza thimu.”
Mugudisi u kombetshedza uri vhatambi vhawe vho livha na u ṱuṱuwedzea u ṋetshedza mutambo muhulwane phanḓa ha vhaṱaleli vha hayani.
“Ndi na vhuṱanzi uri ri ḓo vha ro ḓilugisela. Ro ḓilugisela u kunda mutambo. Fhedzi roṱhe ri a zwi ḓivha uri a zwo ngo eḓana — ri ṱoḓa thuso ṱhukhu u bva kha ḽiṅwe sia.”
Musi tshigwada tsho no ḓilugisela zwavhuḓi, vhumatshelo ha Bafana a vhu nga ḓo ḓitika nga mvelelo yavho fhedzi, fhedzi vhu ḓo dovha ha ḓitika nga uri Nigeria ḽi nga thivhela Benin u wana gundo.
Broos o fhedza nga u amba nga fulufhelo: “Kha ri fulufhele uri midzimu ya bola ya milenzhe i na riṋe — na uri Benin i ḓo kundwa.”
Mutambo u thoma vhukati ha Bafana Bafana na Rwanda ndi nga awara ya vhuṱahe nga madekwana nga Ḽavhuvhili Tshitediamu tsha Mbombela.
Vhalani hafhu: Fulufhelo ḽa Bafana Bafana ḽi kha Nigeria
Mutambo une wa nga ṱalusa vhumatshelo ha Afrika Tshipembe kha Tshiphuga tsha Ḽifhasi.
