Ntwari o phulusa hani vhagudisi vha Chiefs kha vhukhathi

Muḓivhalea wa bola ya milenzhe wapo, Vho-Benedict “Tso” Vilakazi,vho ṋea muhumbulo wavho malugana na khanedzano yo ṱanganaho na mulindavhuno wa Kaizer Chiefs Fiacre Ntwari we a hana u bvisiwa.

Mulindavhuno wa tshigwada tsha Kaizer Chiefs o pomokwa uri o hana u bva mudavhini musi vha tshi khou tamba na Stellenbosch FC mafheloni a vhege o fhiraho.

Vilakazi uri mulindavhuno  o vha a tshi zwidivha uri milayo a i tsha tendela u shandukiswa ha vhatambi, ndi ngazwo vhanwe vhatambi vho gidima vha dzhenelela.

• vhari wana kha facebook| facebook.com/profile.

Mukapuṱeni Zitha Kwinika o vhonala a tshi khou gidima u itela u tandulula fhungo, sa zwe zwa vha zwo ralo kha Sibongiseni Mthethwa, musi vhagudisi vha tshi lingedza u ita tshanduko.

Fhedzi zwi vhonala uri vhagudisi vho kona u shavha vhukhakhi havho nga u vhu hwesa kha Ntwari, vha tshi ri o hana u bva, vha ri o ḓiimisela u isa phanḓa.

“Vho vha vha tshi humbula uri vha ḓo ita tshanduko mbili, vho sedza kha uri vha kha ḓi vha na tshikhala tshithihi tsha u dzhiela vhudzulo tsho salaho tshe vha tendelwa u tshi ita nga tshifhinga tsho engedzwaho,” ho amba Vilakazi.

“Fhedzi vho hangwa uri mulayo u amba uri tshikhala tsha u ita tshanduko ṱhanu tshi fhela musi mutambo u tshi fhela, a tshi fhiriseli kha tshifhinga tsho engedzwaho.

“Ntwari ha ngo hana u bva. Tshigwada tsha thekhinikhala a tsho ngo vhala zwavhuḓi — kana u amba ngoho, a vha pfesesi zwavhuḓi mulayo.

“Ndi ngazwo vho vha vha tshi ṱoḓa u ita tshanduko ya u ḓisa Aiden (McCarthy) na Bruce (Bvuma) nga tshifhinga tsho engedzwaho,” 

“Vho hangwa uri nga tshifhinga tsho engedzwaho, u tendelwa tshikhala tshithihi fhedzi tsha u ita tshanduko… Ngauralo Ntwari o vha a si na mulandu.

“Vhathu vhe vha vha vhe na mulandu ndi tshigwada tsha thekhinikhala — ndi vhone vhe vha vha vha songo fanela u ita tshanduko mbili.

“Arali no ita tshanduko tharu musi mutambo u tshi khou tamba, tshibuli tsha u ita tshanduko mbili dzo salaho tshi a fhela.”

• VHAALANI HAFHU:  Amajita yo bva kha mutatisano wa Tshiphuga tsha Ḽifhasi     

Muhali wa miṅwaha ya 43 o phetha nga u ri: “Nga tshifhinga tsho engedzwaho, u tendelwa tshibuli tshithihi fhedzi tsha u ita tshanduko.”