Kaizer Chiefs a i tei u sendela kule na Pitso Mosimane – Auseb
Mutambi wa kale wa thimu ya Kaizer chiefs, Mohammed Auseb, o bvisela khagala vhupfiwa hawe malugana na mavharivhari ane a khou ṱumanya Pitso Mosimane na tshigwada tsha Naturena.
Mutambi wa kale u dovha a tendelana na vhanwe uri hu tea u vha na tshanduko kha vhagudisi nahone u tikedza muhumbulo wa u thola Mosimane.
“Ndi tenda uri Kaizer Chiefs a yo ngo fanela u aravha kule na mugudisi Pitso Mosimane fhedzi i fanela u mu sendedza tsini navho ngauri vha a mu ṱoḓa vhukuma zwa zwino,” ho amba Auseb.
“Arali vha nga dzhia Mosimane, vha nga wana mvelelo dzavhuḓi ngauri u a ḓivha vhatambi vha Afrika Tshipembe na luambo lune vha lu amba.
“Mugudisi Pitso u a kona u ṱanganya vhatambi uri vha vhe thimu yo ṱanganaho, ine ya ḓo fhedza i tshi khou ofhiwa nga nḓila ine a ḓiimisela ngayo.”
Muthannga wa Namibia o vhonala o fhelelwa nga fulufhelo kha ino khalanwaha. Ndi ngazwo a tshi tenda uri Mosimane u fanela u ḓiswa a thomiwe u fhaṱa kha khalanwaha i tevhelaho.
“Arali vha mu wana zwino, zwi nga vha zwavhuḓi ngauri musi ino khalanwaha i tshi fhela thimu i ḓo dovha ya ṱangana, nahone khalanwaha i ḓaho a nga thoma u wina zwiphuga zwo fhambanaho,” ho isa phanḓa Auseb.
“Mosimane u a zwi ḓivha uri thimu a dzi fani sa zwe dza vha dzi tshi langiwa zwone tshifhingani tsho fhiraho sa mugudisi kha thimu dzo fhambanaho u fana na SuperSport United, Mamelodi Sundowns, Al Ahly…
“Vhulanguli ha Chiefs vhu pfesesa zwavhuḓi vhukuma uri Mosimane ndi mugudisi wa hani na uri u ṱoḓa mini khavho.
“Vhatambi vhane zwa zwino vha kha Kaizer Chiefs vha nga ita mushumo wavhuḓi nga fhasi ha Pitso Mosimane sa izwi ndi tshi mu ḓivha kha SuperSport United.
“Nasraddine Nabi o ita mushumo wawe nahone o ita na u wina khaphu ya Nedbank fhedzi u fanela u ṱuwa u itela u vulela Mosimane nḓila,” ho amba Auseb.
- VHALANI HAFHU | Kaizer Kha Mushumo Wa Jessica Kha FIFA
Nabi zwazwino o imiswa kha Chiefs nahone zwi vhonala uri nyambedzano dzi kha di bvela phanda malugana na u ṱuwa hawe na uri u ḓo lifhiwa hani.
Translated by Nthaduleni Rolivhuwa
