Amajita yo bva kha mutatisano wa Tshiphuga tsha Ḽifhasi
Mugudisi wa vhaswa vhapo na muṱoḓisisi, Vho-Zipho Dlangalala, vha ri a vho ngo tshuwa musi Amajita (thimu ya Afrika Tshipembe ya vhaswa vha fhasi ha miṅwaha ya 20) i tshi bviswa nga u ṱavhanya kha Tshiphuga tsha Ḽifhasi tsha Fifa tsha vha fhasi ha miṅwaha ya 20.
Thimu ya Afrika Tshipembe yo kundwa nga Colombia nga 3-1 zwine zwa vhaisa mbilu nahone ya bviswa kha mutambo wa u thoma wa knockout kha thonamennde ine ya khou farelwa ngei Chile.
Naho thimu ya Raymond Mdaka yo fhedza yo kundwa kha mutambo, yo tamba zwavhuḓi nahone ya sia vhanzhi vhe na fulufhelo ḽa uri thimu i ḓo aluwa na u bvelela u bva kha tshenzhemo.
Fhedzi-ha, Zipho Dlangalala ha tendi uri zwenezwo zwi ḓo itea, nga maanḓa arali thimu dza vhaṱuku dzi sa ṋewi zwishumiswa na nyimele dzo teaho dza u ḓilugisela ho teaho.
“Ndi do pfarela vhane a vha athu vhuya vha tamba kha bola ya milenzhe ya dzitshaka, hu nga vha kha vhuimo ha kilabu kana na thimu ya lushaka,” Dlangalala o vhudza Lisenethini.
“Fhedzi ndi kha ḓi khwaṱhisedza uri thimu — vhatambi na vhagudisi — vhane ra vha rumela sa Afrika Tshipembe kha Dzikhapi dza Ḽifhasi ri tou vha zwipondwa.
“A ri na pulane ya ndugiselo — ya vhuimo vhuṅwe na vhuṅwe ha muṱaṱisano, fhedzi zwihuluhulu musi thonamennde i tsini.”
“Ri ḓitika nga muhumbulo wa vhugevhenga wa u ṱoḓa mvelelo —zwine zwa ṱalutshedzelwa sa tshelede — ri sa vhei vhuḓidini ho teaho kana mushumo wo teaho.”
“Mvelelo dzi dzula dzi tshi fana kha vhuimo vhuṅwe na vhuṅwe, fhedzi a hu na tshine tsha vhuya tsha shandukiswa,” vho ṱalutshedza.
- VHALANI HAFHU: Bafana yo tenda uri u bviswa ha phoindi zwia vhavha
O phetha nga u redza maipfi a Muphurofesa Albert Einstein a ḓivheaho shangoni ḽoṱhe we a ri:
“Arali na dzulela u dovholola zwine na dzulela u zwi ita, ni ḓo dzula ni tshi wana zwe na vha ni tshi zwi wana tshifhinga tshoṱhe.”
Translated by Nthaduleni Rolivhuwa
