Ntwari u do dzhielwa vhukando malugana na u shoniswa ha Chiefs
Zwe Fiacre Ntwari a ita musi a tshi hana u bviswa musi Kaizer Chiefs i tshi kundwa nga Stellenbosch FC kha carling knockout cup zwo ḓisa ṱhoni kha tshigwada.
Mulindavhuno wa Rwanda o hana u bviswa uri a dzhielwe vhudzulo nga Bruce Bvuma musi mutambo u sa athu fhela musi hu tshi vhidzwa penalty.
Mugudisi wa Kaizer Chiefs Vho-Cedric Kaze vho khwathisedza uri vho vha vho pulana uri Bvuma a gavhe dzi penalty arali zwa swika kha zwenezwo.
Fhedzi Fiacre Ntwari o hana u bviswa phanḓa ha shango ḽoṱhe. Nahone naho o vhulunga penalty ya u thoma, ṱhanu dzothe o dzi ṱahela, Kaizer Chiefs yo fhedza yo kundwa kha mutambo.
Vhaṅwe vho ṱalutshedza zwiito zwa Ntwari sa tshiga tsha mupo u si wavhuḓi nga ngomu ha thimu, hune vhatambi vha sa ṱhonifhe vhagudisi vhavho vha tshifhinganyana.
Mugudisi muhulwane Nasreddine Nabi zwa zwino o imiswa mushumoni nga tshigwada nahone Kaze na Khalil Ben Youssef vho tholiwa sa vho mu imelelaho.
Naho Kaze mathomoni o vha a tshi khou dzhiela fhasi tshiwo itshi musi a tshi khou amba na TV,
Nga murahu o tenda uri ndi nyimele i vhavhaho vhukuma nahone i ḓo lavheleswa nga vhuronwane nga ngomu ha kilabu.
“Ndi tenda uri ho vha hu tshiṅwe tshiimo tshi songo ḓoweleaho, ndi zwithu zwine ra ḓo zwi dzudzanya nga ngomu ha kilabu,” Kaze o vhudza vhoramafhungo.
“Ntwari o amba uri u pfa o ḓiimisela u isa phanḓa.O pfa o fanelwa nga u isa phanḓa na u gavha dzi penalty na u thusa thimu.
“O vha a sa khou ṱoḓa u vhaisa, fhedzi khamusi ho ngo zwi ita nga nḓila ye a vha a tshi fanela u zwi ita ngayo. Fhedzi ndi zwithu zwine ra ḓo amba nga hazwo.”
Vhaṅwe vhatikedzi vho ṱuṱuwedza tshigwada uri tshi fhelise thendelano ya Ntwari.
Ho vha hu mutambo wawe wa u thoma wa tshiofisi kha Chiefs nga murahu ha ṅwaha u ṱoḓaho u vha muthihi.
- VHALANI HAFHU: Appollis o fha Mbokazi hafu ya 100k yawe
Musi mutambo u tshi khou tamba o vha a tshi tamba zwavhuḓi, a tshi gavha zwavhuḓi musi bola i tshi khou ṱoḓea, fhedzi u hana hawe u dzhielwa vhudzulo ndi zwone zwe zwa fheleledza zwo kokodza ṱhogomelo khulwane.
Translated by Nthaduleni Rolivhuwa
