Ngoho i vhavhaho: Hugo Broos o amba nga ha Basadien kha Bafana
Mugudisi wa Bafana Bafana Vho-Hugo Broos vho sumbedza mbilaelo nga ha muṅwe wa vhatambi vhavho vhane vha khou fulufhedzisa we a sala murahu nga murahu ha musi o ‘khetha tshelede’ a dzhena kha Mamelodi Sundowns.
Thimu ya Hugo Broos i kha tshumelo ya u gudisa musi i tshi khou lugisela mitambo mivhili ya u fhedzisela ya mitambo ya u ṱanganela kha Tshiphuga tsha Ḽifhasi.
Vha ḓo ṱangana na Zimbabwe na Rwanda kha mitambo ine vha fanela u i wina u itela u dzhena kha World Cup.
Vha ḓo tamba na Zimbabwe kha mutambo wa hayani stadium tsha Moses Mabhida ngei Durban nga Ḽavhuṱanu vhusiku.
Nga murahu ha maḓuvha maṋa, Bafana Bafana yo ṱanganedza Rwanda kha mutambo wayo wa u fhedzisela wa u khetha kha Tshiphuga tsha Ḽifhasi ngei Tshitediamu tsha Mbombela ngei Nelspruit.
Musi a tshi amba nga ha thimu yawe nga Musumbuluwo, Hugo Broos o amba nga ha muṅwe wa vhatambi vhe a vha a tshi fanela u vha litsha nnḓa ha tshigwada ngauri ho ngo tamba kha thimu yawe ntswa – Fawaaz Basadien.
“Ndi thaidzo i bvelaho phanḓa huh; vhatambi vha nanga tshelede u fhira mvelaphanḓa ya mushumo,” ho amba Broos, ane a ḓivha u bvisela khagala mihumbulo yawe, hu sa londwi uri i nga vha i tshi vhavha lungafhani.
“O dzhia tsheo ya u ya Sundowns fhedzi ha khou tamba henefho – o vha o fanela u dzula Stellenbosch kana a nanga iṅwe thimu ine a ḓo i tamba.
“Arali nyimele yawe i sa shanduki a sa tambe, ndi kho ofha uri ha nga do vha hone kha Afcon.”
Basadien o vha a tshi khou sedziwa ubva tshe a dzhena kha Sundowns mathomoni a khalanwaha. Zwi fanaho zwi nga ambelwa Jayden Adams, we na ene a tamba kha Bafana.
Nga murahu ha mitambo mivhili ya u khwalifaya – ine ya ḓo sumbedza arali Bafana Bafana i tshi ḓo vha tshipiḓa tsha Tshiphuga tsha Ḽifhasi tsha ṅwaha u ḓaho – u ḓo tamba Afcon ngei Morocco nga Nyendavhusiku.
Translated by Nthaduleni Rolivhuwa
