Maboe o bvukulula zwe zwa mu ḓisa ‘hayani’ kha Chiefs
Maboe o bvukulula zwe zwa mu ḓisa ‘hayani’ kha Chiefs.
Mutambi muswa wa Kaizer Chiefs Lebohang Maboe o amba nga ha u vhuya hawe kha tshigwada tsha Soweto, a tshi zwi ṱalusa sa tshifhinga tsha u hulisa.
Mutambi wa vhukati wa minwaha ya 30 o dzhena kha Amakhosi nga nwedzi wa Ṱhangule nga murahu ha musi o fhambana na Mamelodi Sundowns.
U ṋekedzwa hawe lwa tshiofisi ho vha hone phanḓa ha zwigidi zwa vhatikedzi ngei Tshitediamu tsha FNB nga tshifhinga tsha mutambo wa Betway Premiership na Sundowns nga ḽa 27 Ṱhangule.
Kha Maboe, hezwi zwi fhira u sokou saina kha iṅwe kilabu.
Mutambi wa vhukati o ḓa nga kha sisiṱeme ya mveledziso ya Chiefs musi a sa athu pfulutshela kha Maritzburg United (zwino ndi Durban City FC).
U tamba hawe zwavhuḓi kha tshigwada tsha KwaZulu-Natal zwo kunga Sundowns.
O mbo ḓi vha saina a tamba mitambo i fhiraho 150, a kora zwikoro zwa 20 na u thusa vhaṅwe vha 23.
Fhedzi u huvhala zwo mu thithisa ngei Chloorkop. Musi a tshi vhuya, o wana zwi tshi mu konḓela u dzhena kha mutevhe wa u thoma.
Khalaṅwaha yo fhelaho, o humbela u dzhena nga khadzimiso, a fhedza e kha SuperSport United, he a sumbedza uri u kha di vha na zwinzhi zwine a nga zwi ita.
Zwino, Maboe uri u khou takalela tshikhala tsha u vusuludza mushumo wawe kha kilabu ine a i vhidza hayani.
“Zwi a ḓiṱukufhadza na u vha ṱhonifho u vha kha Kaizer Chiefs.Ndo takala vhukuma u vhuya hayani.
“Ndi khou ṱoḓa u itela thimu zwavhuḓi, nahone ndi khou ṱoḓa u wina zwiphuga,” Maboe o ralo kha u bvelela hawe ha u thoma kha nyanḓadzamafhungo.
Vho amba izwo musi hu tshi khou vulwa senthara ya zwa mitambo tshikoloni tsha sekondari tsha Phulong ngei Kwa-Thema nga Ḽavhuraru.
- Vhalani hafhu : Siya kolisi u khou yo tamba na All Blacks fhedzi a si mukapuṱeni
Vhatikedzi vha do vha vho lindela nga mafulufulu u vhona uri Maboe u do disa mini kha tafula u engedza maanda a tshigwada tshine tsha vha hone zwino.
Translated by Nthaduleni Rolivhuwa
