Tshinwe tshikhala kha mutambi we a vha e na bvumo ḽivhi
Mutambi we a vha e na bvumo ḽivhi ḽa u sa ḓifara zwavhuḓi o dovha a ṋewa tshiṅwe tshikhala – nahone hu pfi o ḓiimisela u zwi dzhia nga nḓila dzoṱhe nga hetshi tshifhinga.
Nkanyiso Zungu o vhuya a ḓiwana a si na thimu kha ligi ya nṱha naho o vha e na vhukoni vhu sa timatimisiwi, a tshi ḓivhelwa u ita dziphasi dzavhuḓi vhukati.
Fhedzi vhuḓifari hawe vhu si havhuḓi ho ita uri a bve kha thimu nnzhi dze a vha a tshi dzi tamba, u katela na Orlando Pirates.
Nga tshifhinga tshawe kha Pirates, ho vha na dzi thaidzo dze a dzi ita musi a siho kha thimu, zwe zwa ita uri a hadzimiwe kha Richards Bay.
- vhari wana kha facebook| facebook.com/profile.
O dovha a ṱuwa e kha tshiimo tshi si tshavhuḓi sa izwi ho vha hu tshi pfi u khou xelelwa nga vhulangi ha vhutshilo hawe nnḓa ha mudavhi, a tshi khou ita zwithu zwi sa faneli mutambi wa phurofeshinaḽa.
Fhedzi zwino, nga murahu ha nwaha a tshi khou tamba kha division ya u thoma, Vho-John Maduka vho mufha tshinwe tshikhala kha Magesi FC.
Zwi vhonala uri vhane vha vha tsini nae vha amba uri o vula siaṱari ḽiswa vhutshiloni hawe, nahone o ḓikumedzela tshoṱhe kha mushumo wawe.
O tamba kha Pretoria Callies kha muṱaṱisano wa Motsepe Foundation kha khalanwaha yo fhiraho, nahone zwi vhonala uri o ita zwavhuḓi henefho.
- VHALANI HAFHU: PSL na nḓivhadzo ya ndeme nga ha Thikhithi dza MTN8
Naho zwidodombedzwa zwa thendelano na Magesi zwi songo tou vha khagala, hu khou pfi Maduka u a mu fulufhela nahone u mu vhona sa muthu ane a ḓo khwaṱhisa vhukati ha mudavhi ngauri ndi mutambi a re na tshenzhemo.
Translated by Nthaduleni Rolivhuwa
